ಊರೊಳಗಿನ ಜಾಗವೇ ಹಾಗೆ

ಊರೊರಗಿನ ಜಾಗವೇ ಹಾಗೆ

ಮೊದಲಿಗೆಲ್ಲಾ ಒಂಟಿ ಮನೆಗಳು

ಅಲ್ಲಿಯೇ ಮನೆಯ ಚರಂಡಿ

ಧಿಡೀರ್ ರಸ್ತೆ ಹಾದು ಹೋದರೆ

ಯಾವುದೋ ಕೆರೆ ಕಟ್ಟೆ ನುಂಗಿ

ಬೆಳೆದದ್ದಕ್ಕೆ ಮಳೆಗಾಲದ ರಾತ್ರಿ ನಿದ್ರೆಯ

ಹಂಗಿಗಿಲ್ಲ ಅಪಜಯದ ಸೋಗು

ಗ್ಯಾರೇಜುಗಳಿಂದ ತಟ್ಟುವ ಗದ್ದಲಕ್ಕೆ

ಮಾರಮ್ಮ ಗುಡಿಯ ಗಂಟೆಗೆ

ಗೋಪುರಕ್ಕೆ ಸಮಿತಿ ಅಧ್ಯಕ್ಷತೆ

ವರ್ತುಲ ವರ್ತುಲ ಹೊರ ವರ್ತುಲ

ಎನ್ನುವಾಗಲೆಲ್ಲಾ ತಪ್ಪೋದುವ

ಬಟ್ಟೆ ಬ್ಯಾಗು ನೇತಾಕಿಕೊಂಡ ಮಗನ

ಭಾಷಾ ಶುದ್ಧತೆಗೆ ಹಾತೊರೆವವ

ತನ್ನ ಆಟೋದಲ್ಲಿ ಕೇಳುವ ಎಫ್ ಎಮ್

ಬದಲಿಸಿ ಎನ್ನೋ ಪಯಣಿಗನಿಗೆ

ನಾರಾಯಣಪ್ಪ ಎಂಬೋ ಹೆಸರನ್ನ

ಪೋಲೀಸಿನವರು ನಾರಾಯಪ್ಪ ಎಂದು

ಬರೆದದ್ದನ್ನು ಬದಲಿಸಲಿಕ್ಕೆ ಸುತ್ತಿದ್ದರಲ್ಲಿ

ವರ್ತುಲ ವರ್ತುಲ ರಸ್ತೆ ಎದ್ದಿದೆ

ಆ ರಸ್ತೆಗೊಂದು ಹೆಸರಿಡಬೇಕು ಆ ಸಂಸ್ಥೆಗೊಂದು

ಲಾಂಛನ ಕೆತ್ತಬೇಕಂತೆ ಕಟ್ಟಿಗೆಯಲ್ಲಿ ಕಲಂಕಾರಿಯಲ್ಲಿ

ಹೆಮ್ಮೆಯಂತೆ ಕಲಾ ಪೋಷಕರು

ವರ್ತುಲ ರಸ್ತೆ ಪಕ್ಕದ ಊರೊರಗಿನ

ರಾಷ್ಟ್ರೀಯ ವಿದ್ಯಾಸಂಸ್ಥೆಯ ಪ್ರಾಚಾರ್ಯರು

ಊರೊಳಗಿನ ಜಾಗವೇ ಹಾಗೆ

ಚಿತ್ರ ವಿಚಿತ್ರ

ಬೆರಳ ತುದಿಯಲಿ ಆಕಾಶವನೆತ್ತಿ

ಮೊಲೆ ತೊಟ್ಟೆಂದರೆ ನೆಚ್ಚು

ಆಟೋ ಚಾಲಕನ ಕಾಲಿಗೆ ಗಾಯ

ಹಾಲು ಕುಡಿಯದ ಬೆಕ್ಕಿನ ವರಾತ

ಅವ್ಯಕ್ತವು ಹೆಚ್ಚಾಗಬಾರದು

ವ್ಯಕ್ತಕ್ಕಾದರೋ ಉರಿಯಬೇಕಿದೆ

"ನಿನಗೇಕೆ ರಚನೆಯ ಮೇಲಿಷ್ಟು ಮೋಹ?’

ಎಂದದ್ದಕ್ಕೆ -

"ಇಲ್ಲಿ ಬರೀ ಚಿತ್ರಗಳು ನನಗದರ ಮೋಹ

ಬಿಡಲಾರೆ, ಬಿಟ್ಟಿರಲಾರೆ'

ಸಂಖ್ಯೆಗಳೂ ಸಹ ಚಿತ್ರಗಳು

ಮನುಷ್ಯ ಪ್ರಾಣಿ ಮರ ಗಿಡ

ಹೀಗೆ ಚಿತ್ರ ಬರೆಯುತ್ತಾರಲ್ಲ

ಥೇಟ್ ಹಾಗೆಯೇ

ಚಿತ್ರಗಳು ಭೌತಿಕ ಸಾಧ್ಯತೆಗಳು

ಛಂದಸ್ಸು, ಮೇಲೊಂದು ಗೆರೆ ಕೆಳಗೊಂದು

ಚಿತ್ರವೇ ಅದೂ

ಕಡೆಗೆ ಧ್ವನಿಯೂ ಶಬ್ದವೂ 

ಎಲ್ಲಕ್ಕೂ ಮಾದರಿಯೆಂದೆನಿಸಿದ್ದಿದು

ದೇಶಕಾಲವು ಜ್ಯಾಮಿತೀಯ ಆಕಾರ

ಹಾಗಾಗಿ ಅದೊಂದು ಚಿತ್ರ

ಬ್ರೆಡ್ಡಿನ ಪದರಗಳಂತೆ ಒಂದರ ಮೇಲೊಂದು

ದೇಶಕಾಲದ ಸಂರಚನೆ

ಮುಂದೆ ಹಿಂದೆ ಅಲ್ಲಿ ಇಲ್ಲಿ 

 

ವಧುವರಾನ್ವೇಷಣೆ

ಕಸಾಯಿಖಾನೇಲಿ ನೇತುಹಾಕಿದ ದೇವರಫೋಟೋ

ಗಾಜಿನಲ್ಲಿ ಎದುರಿಗಿರುವ ವಧುವರಾನ್ವೇಷಣಾ

ಕೇಂದ್ರದ್ದೇ ಪ್ರತಿಫಲನ

ಆಗಾಗ ಹುಡುಗ ಹುಡುಗಿಯರದ್ದೂ

ಬಹಳ ಅಪರೂಪಕ್ಕೆ ರಚ್ಚು ಹಿಡಿದ

ಮಕ್ಕಳಿಬ್ಬರು ಓಡಿಹೋದ ಸುದ್ದಿ

ಕಾರಿನಿಂದಿಳಿದು ಶುಲ್ಕ ಪಾವತಿ ಕೇಂದ್ರಕ್ಕೆ

ಕ್ರೆಡಿಟ್ ಕಾರ್ಡನ್ನು ಮಾತ್ರ ಕೊಡಲು

ನಿಂತವನೆದುರು ಮುಟ್ಟಾದಾಗ ಮೂರು ದಿನ

ಹೊರಗಿರುವ ಹುಡುಗಿ ಬೇಕೆಂಬ

ವರನ ಒತ್ತಾಯಕ್ಕೆ ಆರಂಕಿದಾಟಿದ್ದೊಂದೇ

ಸಾಕೆನ್ನುವವಳ ಒಪ್ಪಿಗೆಗೆ ಬೊಕ್ಕ ತಲೆಯ

ಬುದ್ಧಿಜೀವಿಗೆ ತರ್ಕದಲ್ಲಿ ಸೋಲಿಸಬಲ್ಲವಳಿಗಾಗಿ

ಹಣ ಕಟ್ಟಲಿಕ್ಕೆ ಸರದಿಯಲ್ಲಿರುವಾಗ

ಪರಿಚಿತಳಾದವಳ ಜಾತಕದ ನಿರೀಕ್ಷೆ

ಮೈಕಲ್ಲಿ ಪ್ರವಚನದ ಮಧ್ಯೆ

ಆತ್ಮವು ಸುಡುವುದಿಲ್ಲ

ಎಂದದ್ದು ಕೇಳಿ

ಕಸಾಯಿಖಾನೆಯದೇ ವಾಸನೆ - ಎಷ್ಟೇ

ದೂರಿದರೂ ಯಾರೂ ಕೇಳಿಸಿಕೊಳ್ಳುವವರಿಲ್ಲ

ಹೀಗಿರಲಾಗಿ ನಡುವೆ

"ಈ ಜೀವ ನಿನಗಾಗಿ" ಎಂದು

ಆರತಕ್ಷತೆ ಸಮಾರಂಭದ ಆರ್ಕೆಸ್ಟ್ರಾದಲ್ಲಿ ಹಾಡುವವನ

ಮನೆಯಲ್ಲಿ ವಾಸನೆ ಕೆಟ್ಟ ವಾಸನೆ

ಉದುರಿದ ಕೂದಲು ಬಚ್ಚಲು ನೀರಿಗೆ ಸಿಕ್ಕಿ

ಮನೆಯೆಲ್ಲಾ ಕೊಳಚೆಯಾಗಿದೆ

ಅವನಪ್ಪ ಹಾಡಿದ್ದ ಗಿರಿಜಾ ಕಲ್ಯಾಣ

ರೆಕಾರ್ಡ್ ಮಾಡಿದ್ದ ಕ್ಯಾಸೆಟ್ ಹಾಕಿದ್ದ

ಟೇಪ್ ರೆಕಾರ್ಡರ್ ಈ ನೀರಲ್ಲಿ ಸಿಕ್ಕಿದ್ದಕ್ಕೋ ಏನೋ

ಕುಯ್ಯೋಂ ಕುಯ್ಯೋಂ ಕುಯ್ಯೋಂ ಎಂದೆನ್ನುತ್ತಲೇ ಇದೆ

ಹೊಸ ಮನುಷ್ಯ: “ ಈ ಅಭಿವೃದ್ಧಿ ಇನ್ನು ಸಾಕು" ಒಂದು ಚರ್ಚೆ

 ಹೊಸ ಮನುಷ್ಯ ಮಾಸಿಕ ಪತ್ರಿಕೆಯು ಡಿ.ಎಸ್. ನಾಗಭೂಷಣ ಅವರ ಸಂಪಾದಕತ್ವದಲ್ಲಿ ಪ್ರಕಟವಾಗುತ್ತಿದೆ. ಇಂದಿನ ಕರೋನ ಸಮಸ್ಯೆಯು ನಮ್ಮ ಬದುಕಿನ ಬಗೆಗೆ, ಮುಖ್ಯವಾಗಿ "ಅಭಿವೃದ್ಧಿ" ಎಂಬುದರ ಬಗೆಗಿನ ನಮ್ಮ ಚಿಂತನೆಗಳನ್ನು ಪ್ರಶ್ನಿಸಬೇಕಾದ ಅನಿವಾರ್ಯತೆಯನ್ನು ಜೂನ್ ಸಂಚಿಕೆಯಲ್ಲಿ ಚರ್ಚಿಸಿದ್ದಾರೆ. ಈ ಚರ್ಚೆಯಲ್ಲಿ ಹಲವರು ಭಾಗಿಯಾಗಿ ಅವರ ಚಿಂತನೆಗಳನ್ನು ಹಂಚಿಕೊಂಡಿದ್ದಾರೆ.  ಈ ಚರ್ಚೆಯು ಬಹಳ ಮಂದಿಗೆ ತಲುಪಬೇಕಾದ ಅವಶ್ಯಕತೆಯಿರುವುದರಿಂದ ಕೆಳಗಿನ ಕೊಂಡಿಯಲ್ಲಿ ನೀವು ಲೇಖನಗಳನ್ನು ಓದಬಹುದು.  ಈ ಲೇಖನಗಳನ್ನೊಳಗೊಂಡ PDF ಆವೃತ್ತಿ ಕೆಳಗೆ ಲಭ್ಯವಿದೆ.  

(ಈ ನೀಲಿ ಬಣ್ಣದ ಕೊಂಡಿಯನ್ನು ಕ್ಲಿಕ್ಕಿಸಿ :) 

ಹೊಸಮನುಷ್ಯ : ಈ ಅಭಿವೃದ್ಧಿ ಇನ್ನು ಸಾಕು 

ಈ ಚರ್ಚೆಯಲ್ಲಿ ಭಾಗಿಯಾದವರ ಲೇಖನಗಳ ವಿವರಗಳು ಇಂತಿವೆ :

೧. ವೈಯುಕ್ತಿಕತೆ ಮತ್ತು ಸಮುದಾಯ ಪ್ರಜ್ಞೆ : ಲಕ್ಷ್ಮೀಶ ತೋಲ್ಪಾಡಿ

೨. ಈ ಅಭಿವೃದ್ಧಿ ಇನ್ನು ಸಾಕು : ಡಿ. ಎಸ್. ನಾಗಭೂಷನ್

೩. ಇದು ಏಕಾಂಗಿಯಾಗಿ ಮಾಡುವ ಕೆಲಸವಲ್ಲ: ರಾಜೇಂದ್ರ ಚೆನ್ನಿ

೪. ಕರೋನ ಕಲ್ಪಿಸಿದ ಅವಕಾಶ : ಅಕ್ಷರ ಕೆ. ವಿ 

೫. ಬೆಳೆ ಭೂಮಿಯೊಳಗೊಂದು ಪ್ರಳಯದ ಕಸ ಹುಟ್ಟಿ: ಗೀತ ವಸಂತ

೬. ನನ್ನ ಜೊತೆ ಇರುವುದು ಕೇವಲ ನಾಲ್ಕು ಜೊತೆ ಖಾದಿ ಬಟ್ಟೆಗಳು : ಸಂತೋಷ್ ಕೌಲಗಿ

೭. ಆರಂಭಕ್ಕೆ ಐದು ಸರಳ ಸೂತ್ರಗಳು :: ಕೇಶವ ಎಸ್ ಕೊರ್ಸೆ

ಅನುತ್ತರ

ನನ್ನಾಕೆ ಮರಿ ಆನೆ ಪಳಗಿಸೋ
ಮಾವುತಳ ಕೆಲಸಕ್ಕೇ ಲಾಯಕ್ಕು
ಎಂದೆನಿಸಿ
ಮರಿ ಆನೆಯ
ಅಕ್ಷರಾಭ್ಯಾಸಕ್ಕೆ ಬಳಪ ಹಲಗೆ
ತಯಾರಿಸೋಕ್ಕೆ
ಇಡೀ ಕಾಡು ಇಡೀ ಭೂಮಿ ಹುಡುಕಿ
ಹೊರಟು ದಾರಿ ಬದೀಲಿ
ನನ್ನನೆಳೆದೊಯ್ಯುವಾಗ ಸೆಳೆತದ
ಸದ್ದು ಕೇಳಿ ನೀರು ಹೋ ಎಂದದ್ದೇ
ನೀರೊಳಗಿನ ಮಿಣುಕುಹುಳ ಬಾಯ್ತೆರೆದು
ನನ್ನನೊಳಹಾಕಿಕೊಂಡಿತು